【芬】Fun ● Honeymoon - 後記

手信篇

Marimekko，係芬蘭本土設計既經典品牌，全世界有40個國家 (包括北歐、北美洲、亞太區)可以買到佢既產品。呢個係機場時，當地人介紹我買既Marimekko碎銀包系列 €12/個

聖誕老人村買既手信

Fazer系列: 除左之前介紹過係Ranua Zoo內可以買到最平既Fazer Chocolate外，Helsinki Vantaa 機場內都有一間免稅店可以買到比出面市中心平少少既Fazer產品，我地轉機沿途就經過啦.....但留意機場既其他店都會貴d，所以大家如果要到機場買Fazer，最好格一格價先，唔係分分鐘買得貴過出面架~ 我買Karl Fazer €4.2/盒 (圖中最上面藍色個盒朱古力)

係Helsinki及Inari既超市買既戰利品

其他手信店購買既...

大家估下呢條似襪褲既係咩東東?

原來係Estonian style既冷帽 (連頸巾)，係Tallinn舊城區買到 €22.5

Ranua Zoo 內製既紀念品，非常精美! €20

右3支係Inari手信店買 (€4.9/支)，而左邊個支係Hotel Kakslauttanen內買 (€7)好彩只買貴一支je!

坐Sampo船既證書

誇過北極圈線(66º33’07" N )既証書

同聖誕老人既合照! 係聖誕老人村既live cam都見到佢架~

Inari超市買既，因為太平又好飲，我地仲搬左盒返屋企^^ (但個人認為當然唔夠維他好飲啦)

唔知係咪隔離飯特別香，外國既著片好似好味d...唔通因為佢地d薯靚d?

資訊篇1

要遇上北極光，最少具備以下條件:

1. 天氣: 網上資料提供，極光會係寒冷既地帶出現，至於要幾凍，就無實際提及要幾多溫度!

除左要凍，個天夠唔夠清都好重要! 如果有雲，好大機會遮住極光令大家睇唔到架!

2. 保護措施: 大家係寒冷既天氣下影極光，千祈唔好貪方便除低手襪....唔係好似我咁凍傷囉~ 當然防寒衣襪唔可以少，手指同腳指最易凍，請著多幾對冷襪呀~

3. 月光: 極光要係無光害下先觀賞到，我地處於既Inari，雖然當地光害少，可惜遇上月亮又圓又光，直接減弱左極光既光線! 如果當日月光弱，一定會清楚D欣賞極光啦!

4. 相機: 每部相機都會有唔同設定，以我部Canon S90既傻瓜機為例，我影極光相既設定為 : 光圈 2.8, ISO 1600, 快門 15秒 (大家可作參考呀)

資訊篇2

經過11日既遊歷，有小小心得比大家:

1. Helsinki既超市比其他小城市如 Kemi、Rovaniemi 都貴....所以如果大家想買d食用品或手信，不妨集中係小城市既超市! 另外如果大家尾站係Inari，我建議可以最後一日先選購手信，因為Inari有超市同手信店，咁大家唔洗拎住咁多手信咁多日啦 (但Fazer chocolate係Inari超市買唔算平，大家要留意!)

2. Helsinki市內有得買1-7 day pass，其實我本人都幾建議買，因為周圍都有電車巴士，所以一pass在手真係方便! 另外仲可以憑pass乘坐去Soumenlinna既船添! 假如大家買Single Ticket，要留意用完一程交通之後，可以繼續於60 min內再轉乘另一程交通架! 而係airport去市中心既Single Ticket就貴多少少，但有80min有效轉乘! 大家計劃好自己行程，好好利用免費既轉乘服務啦!

更多資料: http://www.hsl.fi/EN/Pages/default.aspx ( 大家唔確定乘坐咩交通工具，網頁內既Journey Planner 可以幫到你)

3. 除左Single Ticket、1-7 day pass，仲有Helsinki Card (除左免費交通外，憑此卡還可免費參觀指定既博物館同觀光景點，亦可於指定餐廳、sauna、concert等享用折扣

有關資料: http://www.helsinkiexpert.com/helsinki_card
4. 北歐人好識享受生活，到訪前最好留意自己想去既餐廳/景點既開放時間，唔係分分鐘摸門釘架 (尤其係冬天同聖誕節期間大部份既店舖好早關門架)
5. 交通服務特別係長途巴士，雖然唔算好準時(好似我地係Ranua Zoo等左幾個字車，係Kakslauttanen又等左幾個字車>.<)，但我都建議大家要準時甚至提早5-10min到達巴士站，因為miss左一班車，可能要等最少幾小時架

關於長途巴士資料: www.matkahuolto.fi/en/ (可自行查看長途巴士日程、時間表、路線及價錢)

6. 芬蘭無論酒店、民宿、backpackers既hostel都非常乾淨，就算我地住一間$550幾既hostel (共用浴室同廚房)，都無任何唔舒服既感覺。所以大家可以放心揀住宿，平d都唔洗太擔心!

7. 聖誕節期間去芬蘭同北極圈帶要留意一點，VR Train同長途巴士都會暫停服務(24 Dec下午同25 Dec 全日)，所以當時我23號到達Rovaniemi，26號再坐車北上Saariselka